10 маусымда Алматы облысының Іле ауданындағы "Қазпошта" АҚ филиалында жалпы салмағы 800 граммға жуық есірткі заты (гашиш майы) сығындысы бар сәлемдеме келіп түскені белгілі болды.
Ведомство күдіктінің Telegram мессенджерін пайдаланып, Тайландтан есірткіге тапсырыс бергенін анықтады.
"Пошта жөнелтілімін ашу кезінде косметикалық заттар түрінде жасырылған 8 банканың ішінде есірткі заттары анықталды. Сот үкімімен кінәлі тұлғаға 16 жылға бас бостандығынан айыру жазасы тағайындалып, тәркіленген есірткі жойылды." ҚМА баспасөз қызметі
Жалпы, ағымдағы жылдың басынан бастап ҚМА контрабанда және есірткі құралдарының заңсыз айналымы фактілеріне қатысты 135 қылмыстық іс тіркеді.
Сонымен қатар, 77,1 кг есірткі құралдар, 3,2 кг психотроптық заттар, 206 мың анаболиктер (улы зат) және 1 700 "Тропикамид" көз тамшылары тәркіленді.
Қаржылық мониторинг агенттігі есірткі контрабандасы қатаң қылмыстық жауапкершілікті көздейтін ауыр қылмыс екенін еске салады.