2025 жылдың 10 ақпанында "Қайтарылған активтерді басқару жөніндегі компания" ЖШС Нұра ауданы, Қараөткел шағын ауданында орналасқан Астана қаласындағы элиталық үйге электрондық аукцион жариялады.
"Нысан: жертөлесі бар тұрғын үй. Бастапқы бағасы: 1 883 338 958 теңге. Кепілдік: 117 960 000 теңге. Пішімі: бағаны көтеруге арналған аукцион", – деп хабарлады компания.
Аукцион 2025 жылдың 25 ақпанында сағат 10.00-ге жоспарланған.
Сурет: ҚР ҰҚК
Е-qazyna.kz сайтында лоттың сипаттамасында үй екі қабатты, жертөлесі бар, жалпы ауданы 2877,7 ш.м. Мұнда мүліктің фотосуреттері де жарияланған. Ал олардың пайымдауынша, бұл үй Ұлттық қауіпсіздік комитетінің бұрынғы басшысы Кәрім Мәсімовке қатысты қозғалған қылмыстық іс аясында тәркіленген. Дәл осындай суреттерді Ұлттық қауіпсіздік комитеті 2022 жылғы тергеу есебінде жариялады.
"Сонымен қатар Мәсімовтің премьер-министр қызметін атқара жүріп елордада бизнес құрылымдардың бірінен құны шамамен 2,5 миллиард теңге тұратын элиталық қонақ үй мен жер телімін алғаны бойынша да тергеу басталды", – деп хабарлады құқық қорғау органы сол кезде.
2023 жылы 24 сәуірде Кәрім Мәсімов мүлкі тәркіленіп, мемлекеттік қызметте лауазымдарды атқару құқығынан өмір бойына айырумен 18 жылға бас бостандығынан айырылды. Ол мемлекетке опасыздық жасау, билікті күштеп тартып алу және қызметтік өкілеттігін асыра пайдалану бойынша кінәлі деп танылды. 2024 жылдың 14 қарашасында оған қатысты жаңа қылмыстық істер қозғалғаны белгілі болды. Ұлттық қауіпсіздік комитетінің мәліметінше, ол ақшаны жылыстату және аса ірі көлемде пара алды деген күдікке ілінген.