Мониторинг шеңберінде су басу қаупі бар аумақтарға, оның ішінде Марқакөл, Глубокое және Шемонаиха аудандарына аэровизуалды барлау жүргізілді.
Жедел деректер бойынша облыстың шамамен 70% аумағында әлі де қар жатыр. Өзендердегі мұз ыдырағанымен, гидрометеорологиялық жағдай тұрақты және үнемі бақылауда.
"Тәулік бойы мониторинг қамтамасыз етілді. Барлық күштер мен құралдар дайын. Біз тез, үйлесімді және алдын ала әрекет етуіміз керек", - деді министр Шыңғыс Әрінов.
Сурет: Төтенше жағдайлар министрлігінің баспасөз қызметі
Су тасқыны тәуекелдерін азайту мақсатында жалпы ауданы 160 мыңнан астам шаршы метр 16 учаскеде жарылыс жұмыстары жүргізілді, 387 мың текше метр қар шығарылды, 4 940 су өткізу құрылысы, 550 шақырым арықтар мен каналдар тазартылды, 437 көпірде жұмыстар жүргізілді.
Бөгендерді нығайту және жедел ден қою үшін 10,3 мың тонна инертті материал, 299 тонна отын және 91 мыңнан астам қап қажетті резерві құрылды.
Су тасқыны жағдайын бақылау және ықтимал салдарларды жою бойынша жұмыс тәулік бойы жүргізіледі. Жағдай ТЖМ-ның толық бақылауында.