Рахметуллин америкалықтар консулдық үшін Алматыда екі ғимаратты жалға алып жатқанын атап өтті. Ал жаңа ғимарат бой көтерген бойда қызметкерлер сонда көшетін болады.
"Басқа жаңа пәтерге көшкенде ешкімді қалдырмаймыз ғой. Қызметкерлер де жай ғана жаңа ғимаратқа көшеді", – дейді Ақан Рахметуллин.
Ол заң ратификацияланғаннан кейін Алматы әкімдігі мен АҚШ Бас консулдығы қоныс аудару тәртібін егжей-тегжейлі қарастыратын келісім жасасатынын түсіндірді. Ақан Рахметуллин америкалықтар құрылыс мәселесін кешіктірмейді деп есептейді.
Ғимаратты америкалық компаниялар салады.
Бұған дейін сенат депутаттары Алматыдағы консулдық мекеменің ғимаратын салу үшін АҚШ-қа жалға жер телімін беру туралы үкіметаралық келісімді ратификациялаған болатын. 70 593 ш.м. 25,3 миллион долларға 49 жыл мерзімге жалға алуға болады. Ғимаратта АҚШ-тың Сауда министрлігі, Есірткіге қарсы күрес агенттігі және АҚШ Коммерциялық қызметі де орналасады.