Бұл туралы 2025 жылғы 8 шілдеде Ақмола облыстық соты хабарлады: талапкер 2019 жылы көлік сатып алған, ал 2023 жылы оны сатпақ болған кезде, көліктің Украинада ұрланғаны анықталған. Салдарынан азамат көлікті иелену құқығынан айырылған.
Осыдан кейін көлік иесі сотқа жүгініп, келісімді жарамсыз деп тануды және көлік үшін төленген соманы сатушыдан өндіріп беруді сұраған. Алайда жауапкер талаппен келіспей, шарт орындалғанын және талап қою мерзімінің өтіп кеткенін айтып, істі қараудан бас тартуды сұраған.
Сотта ҚР Ішкі істер министрлігінің өкілдері бұл көлік 2015 жылдың желтоқсанынан бері ұрланған көлік ретінде базада тіркелгенін түсіндірді.
Сот келесі негіздер бойынша келісімді жарамсыз деп таныды:
- Талапкер көлікті сатып алу кезінде оның заңды мәртебесі туралы шынайы ақпаратқа ие болмаған және адасқан күйде болған;
- Келісім жасалған кезде көлік ұрланған және оған шектеулер қойылған;
- Талапкер заңсыз жолмен әкелінген автокөлікті сатып алған, ал ондай көлік сатып алу-сату нысаны бола алмайды;
- Жауапкердің талап қою мерзімі бойынша жасаған өтініші негізсіз, өйткені талапкер өз құқығының бұзылғанын 2023 жылы білген және талап заңда белгіленген мерзім ішінде берілген.
Сот мәлімдемесінде былай делінген:
"Автокөліктің құнын өндіру туралы талап келісімді жарамсыз деп тану талабынан туындайды. Көлік тәркіленген, тіркеу әрекеттері жүргізілмейді. Көлікке меншік құқығы К.-ге (сатушы – ред.) өтеді, ол өз мүлкін қорғау үшін көлікті оған сатқан тұлғаға талап қою арқылы жүгінуге құқылы. Сот шешімімен талап қанағаттандырылды, көлік сату-сатып алу келісімі жарамсыз деп танылып, талапкердің пайдасына төлем сомасы өндірілді", - деп хабарлады сот.
Сот шешімі заңды күшіне енді.