Бұл туралы 2025 жылдың 22 шілдесінде белгілі болды. Комиссия мүшелері бұған дейін мектеп оқушыларымен, мекеме басшылығымен және ұжымымен, сондай-ақ білім беру жүйесінің өкілдерімен кездесті.
Тексеру аясында Президент Әкімшілігінің өкілдері балалар үйіндегі тұрмыстық және білім беру жағдайымен танысып, іргелес инфрақұрылым нысандарын аралап көрді.
"Қазіргі уақытта көшу туралы шешімге қатысты құжаттарды жинау және талдау жұмыстары жүргізілуде. Жетім балаларға қатысты заңнамада көзделген барлық әлеуметтік және құқықтық кепілдіктердің сақталуына ерекше назар аударылады. Тексеру балалардың құқықтары мен мүдделерін қорғауға басымдықпен жүргізілуде", – делінген хабарламада.
Бұған дейін Алматыдағы "Арнаулы әлеуметтік қызметтерге мұқтаж балаларды қолдау жөніндегі облыстық орталығы" ММ ғимаратының апатты жағдайына байланысты балаларды Қонаев қаласында орналасқан балалар үйінің жаңа ғимаратына көшіру туралы шешім қабылданғаны туралы ақпарат тараған болатын.
Ал 2025 жылдың 21 шілдесінде президент Қасым-Жомарт Тоқаевтың бұл жағдайға реакциясы белгілі болды. Тоқаев Алматы қаласының әкімі Дархан Сатыбалдыға оңтүстік астанадағы тәрбиеленушілерінің оқу үдерісін жалғастыру үшін балалар үйін жөндеуден өткізуді, сондай-ақ бұл нысанды қала балансына алуды тапсырды. Бұл әрекеттің күші жойылып, қызметтік тергеу тағайындалды.