Қалалық төтенше жағдайлар департаментінің мәліметінше, 28 шілдеге дейін күн қатты ыстық болады – ауа температурасы +35…+39° аралығында сақталады.
"Қала маңында өрт қаупінің бесінші – төтенше класы тіркелді. Мұндай жағдайда кішкентай ғана ұшқынның өзі үлкен өртке ұласуы мүмкін", - деп мәлімдеді ведомство.
Қала әкімдігімен бірлесе отырып, 104 шақырым аумақта құрғақ өсімдіктер шабылып жатыр. ТЖД өкілдері қала тұрғындары мен қонақтарына мынадай талаптарды сақтауға шақырады:
- құрғақ шөп маңында от жақпау, темекі шекпеу, шөп өртемеу;
- электр желілерін шамадан тыс жүктемеу – бір розеткаға бірнеше қуатты құрылғыны қоспау;
- балаларды жабық көлікте қалдырмау;
- күн астында ұзақ болмау – қызып кету мен күн өту қаупі бар.
"Өрт салдарына себепкер болғандар қылмыстық жауапкершілікке тартылуы мүмкін", - деп ескертті ТЖД.
Сонымен қатар департамент 2025 жылдың басынан бері құрғақ шөпті жырту және шабу шараларына қарамастан, қалада 300-ден астам өрт тіркелгенін айтты. Олардың кейбірі тау бөктеріндегі өртке ұласып, тұрғын үйлерге қауіп төндірген.