Мұндай мәліметті 2025 жылғы 5 тамызда ҚР Еңбек және халықты әлеуметтік қорғау министрлігінің (ЕХӘҚМ) баспасөз қызметі ұсынды. Ведомство мәліметінше, Отбасының цифрлық картасы (ОЦК) мемлекеттік органдардың барлық қолданыстағы ақпараттық жүйелеріндегі деректер негізінде қалыптастырылады.
Бүгінде ОЦК-де Қазақстанның 20,2 миллион азаматы немесе 6,2 миллионнан астам отбасы туралы ақпарат жинақталған.
Мамандардың айтуынша, қазіргі уақытта ОЦК мемлекеттік қолдау шараларын алуға құқығы бар қазақстандықтарға ешқандай өтінішсіз келесі 11 жәрдемақы мен әлеуметтік төлемді рәсімдеуге мүмкіндік береді:
- еңбекке қабілеттілігін жоғалтқан жағдайда төленетін әлеуметтік төлем;
- жұмысынан айырылған жағдайда төленетін әлеуметтік төлем;
- асыраушысынан айырылу бойынша төлем немесе жәрдемақы;
- бала тууына және 1,5 жасқа дейін бала күтіміне байланысты жәрдемақы;
- мүмкіндігі шектеулі баланы тәрбиелеп отырған ата-анаға (қамқоршыға) берілетін жәрдемақы;
- мүгедектік бойынша жәрдемақы;
- көпбалалы отбасыларға арналған жәрдемақы;
- "Алтын алқа", "Күміс алқа" алқаларымен марапатталған аналарға берілетін жәрдемақы;
- атаулы әлеуметтік көмек;
- жерлеуге арналған біржолғы төлем.
Сондай-ақ, ОЦК арқылы зейнетақы төлемдерін алу мүмкіндігі, "қандас" мәртебесінің аяқталу мерзімі және жұмыссыздарға арналған жұмыспен қамту шаралары туралы автоматты хабарламалар іске асырылған.
Мемлекеттік қолдау шараларын алу құқығы анықталған жағдайда азаматқа 1414 бірыңғай байланыс орталығынан SMS-хабарлама жолданады.
"SMS алған азамат оған келісімін білдіріп жауап беруі тиіс. Өтінішті рәсімдеу және әлеуметтік төлем немесе жәрдемақыны тағайындау автоматты түрде жүзеге асырылады. Кейін қаражат алушының банк шотына аударылады", – деп хабарлады ҚР ЕХӘҚМ баспасөз қызметі.
Алаяқтық әрекеттердің алдын алу мақсатында, тек 1414 нөмірінен келген SMS-ке ғана жауап беру қажет екені ерекше атап өтіледі.
"Барлық сұрақтар бойынша 1414 нөміріне қоңырау шалу қажет. Қоңырау тегін", – деп атап өтті ведомство.
Бұған дейін министрлік баспасөз қызметі Қазақстанда көпбалалы отбасылар мен марапатталған аналарға көрсетілетін мемлекеттік қолдау шаралары туралы еске салған болатын.