Қыркүйектің басы
Болжам бойынша, айдың басында, батыс өңірлерді қоспағанда, республика аумағында суық ауа массаларының әсерінен күн суытады.
"Салехард аудандарынан келген суық ауа әсерінен ауа температурасы төмендеп, республиканың оңтүстік-шығыс және шығысындағы таулы аймақтарда жауын-шашын (жаңбыр, қар аралас жаңбыр) күтіледі", - делінген "Қазгидромет" РМК баспасөз хабарламасында.
Қыркүйектің алғашқы онкүндігінде елдің басым бөлігінде ауа райы тұрақсыз болады: жаңбыр, найзағай, бұршақ, екпінді жел күтіледі.
"Жауын-шашын тоқтаған кезде солтүстік, орталық және шығыс аймақтарда алғашқы үсік қаупі бар. Түнде және таңертең республиканың солтүстік жартысында тұман түсуі ықтимал", - деп нақтылады "Қазгидромет".
Айдың алғашқы онкүндігіндегі ауа райы:
- республиканың батысы мен оңтүстік-батысында күндізгі температура +32…+40°С-қа дейін ысып, онкүндіктің ортасына қарай +17…+25°С-қа дейін төмендейді;
- солтүстік, солтүстік-батыс (Қостанай облысы), орталық және шығыс өңірлерде түнгі температура +3…+8°С-тен +5…+15°С-қа дейін, күндіз +12…+18°С-тен +20…+28°С-қа дейін көтеріледі, топырақ бетінде -2°С-қа дейін үсік күтіледі;
- Қызылорда және Түркістан облыстарында күндізгі ауа +25…+32°С-тен +30…+39°С-қа дейін ысиды;
- оңтүстік-шығыста түнгі температура +8…+13°С-тен +13…+18°С-қа дейін, күндіз +18…+23°С-тен +28…+35°С-қа дейін көтеріледі.
Айдың екінші және үшінші онкүндіктерінде
Температура жиі құбылып тұрады:
- батыс, солтүстік-батыста түнде +13…+19°С пен +2…+12°С аралығында, топырақ бетінде -3°С-қа дейін үсік болуы мүмкін, күндіз +25…+32°С пен +18…+26°С арасында өзгереді;
- солтүстік, орталық және шығыс аймақтарда түнде +1…+6°С, үшінші онкүндікте -1…-6°С үсік пен +7…+13°С аралығында, күндіз +8…+13°С пен +20…+28°С арасында ауытқиды;
- еліміздің оңтүстік бөлігінде ең салқын күндері түнде топырақ бетінде -3°С-қа дейін үсік, күндіз +11…+20°С күтіледі. Кейбір күндері жазға тән ыстық сақталып, күндіз +25…+35°С-қа дейін көтеріледі.
"Бұл айлық болжам кеңес түрінде ұсынылады және синоптикалық жағдайға байланысты алдағы уақытта нақтыланып, онкүндік ауа райы болжамдарымен түзетіледі", - деп түсіндірді "Қазгидромет" РМК баспасөз қызметі.