Министрдің айтуынша, елімізде дәнді дақылдардың алқабы қысқартылып, есесіне майлы дақылдардың егістік көлемі 1 млн гектарға ұлғайтылған.
"Биыл біз 4 млн тонна майлы дақыл тұқымын жинаймыз деп күтіп отырмыз – мұндай көрсеткіш бізде бұрын-соңды болмаған. Қазір 88 қайта өңдеу кәсіпорнымыз бар. Олардың жүктемесі 70%-дан аспайды. Барлық қайта өңдеу зауыттары, сондай-ақ элеваторлар майлы дақыл тұқымдарын, сүрлемді сақтауға дайын", – деді Сапаров.
Министр қайта өңдеуде ешқандай мәселе туындамайтынын айтты.
"Бізде маймен қамтамасыз ету, негізінен, 100%-дық деңгейде. Бірақ импорт та, экспорт та бар. Қанша импорттасақ, сонша экспорттаймыз", – деп қосты ол.
Бұған дейін АШМ майлы дақылдардан рекордтық өнім болатынын хабарлаған еді.