Метеорологтардың ескертуіне сәйкес, атмосфералық фронтальды бөліктердің өтуіне байланысты еліміздің көп бөлігінде жауын-шашын болады.
Мәселен, елдің шығысы мен оңтүстік-шығысында жауын-шашын (жаңбыр, қар) мол түседі.
"Оңтүстікте найзағай, бұршақ, дауыл, ал солтүстік-батыста көктайғақ болады", - деп мәлімдеді "Қазгидромет" РМК баспасөз қызметі.
Тек батыс өңірлерде жауын-шашынсыз ауа райы сақталады.
Бұдан бөлек, республиканың кей жерлерінде жел күшейіп, тұман түседі.
Сонымен қатар бес облыстың тұрғындарына үсік болатыны жөнінде ескерту жасалды.
"Батыс Қазақстан, Атырау облыстарының солтүстігі мен шығысында, Шығыс Қазақстан облысының солтүстігінде, Абай облысының батысы мен солтүстігінде -3°C дейін үсік күтіледі. Қызылорда облысының батысы мен солтүстігінде топырақ бетінде -2°C дейін үсік жүреді," - делінген хабарламада.
Оған қоса, еліміздің өзге өңірлерінде өрт қаупі жоғары деңгейде сақталады:
- Батыс Қазақстан облысының батысы, солтүстігі мен орталығында, Атырау облысының солтүстік-шығысында, Ақтөбе облысының оңтүстігінде – жоғары өрт қаупі;
- Түркістан, Қызылорда облыстарында, Атырау облысының солтүстігі, оңтүстігі мен шығысында, Жамбыл облысының батысы, солтүстігі мен орталығында, Батыс Қазақстан облысының солтүстік-батысы, оңтүстігі мен оңтүстік-шығысында, Ақтөбе облысының батысы, солтүстігі, солтүстік-шығысы мен орталығында, Алматы облысының солтүстігінде, Ұлытау облысында – төтенше өрт қаупі күтіледі.