Құқық қорғау органдарының мәліметінше, интернет-алаяқтар азаматтарды алдау үшін түрлі айла-тәсілдерді қолдануда.
Солардың бірі – жастарға өз атына SIM-карта рәсімдетіп, кейін оны үшінші тұлғаларға беру немесе сату үшін "жеңіл табыс" ұсыну.
Полиция мұндай әрекеттер алғашында зиянсыз болып көрінгенімен, оның салдары ауыр болуы мүмкін екенін ескертті.
"Егер сіздің атыңызға тіркелген SIM-карта қылмыстық мақсатта пайдаланылса, құқықтық жауапкершілік ең алдымен нөмір иесіне, яғни сізге жүктелуі мүмкін", – деп мәлімдеді ведомство.
Полиция алаяқтардың SIM-карталарды қандай мақсатта пайдаланатынын да түсіндірді:
- банк қосымшалары мен онлайн сервистерді бұзу;
- азаматтардың жеке деректерін ұрлау;
- қоңыраулар мен хабарламалар арқылы алаяқтық схемаларды жүзеге асыру;
- заңсыз әрекеттерді жасырын түрде жасау.
Осыған байланысты азаматтарға мынадай сақтық шараларын ұстану ұсынылды:
- өз атыңызға рәсімделген SIM-картаны ешкімге бермеңіз;
- бейтаныс немесе күмәнді адамдардың ұсынысына келіспеңіз;
- "сатып аламыз" немесе "өзіңіздің атыңызға рәсімдеп беріңіз" деген ұсыныстардан бас тартыңыз;
- жеке деректеріңізді, SMS-кодтар мен тіркеу мәліметтерін құпия сақтаңыз;
- күмәнді жағдай туындаса, бірден құқық қорғау органдарына хабарласыңыз.
Полиция азаматтарға SIM-картаның жай ғана телефон нөмірі емес, адамның цифрлық сәйкестігі екенін еске салды.
Бұған дейін Қазақстан Ұлттық банкі де қазақстандықтарға шұғыл ескерту жасаған болатын.