Агенттіктің хабарлауынша, бұқаралық ақпарат құралдарынан келіп түскен сауалдарға байланысты таратылып жатқан мәліметтер шындыққа сәйкес келмейді.
"Атап айтқанда, бірыңғай банкаралық QR-кодты реттеу мәселелері агенттіктің құзыретіне кірмейді. "Қазақстан Республикасының Ұлттық Банкі туралы" заңға сәйкес QR-кодтың жұмыс істеуі, төлем жүйелерін реттеу, сондай-ақ банкаралық төлемдердің қағидалары мен тарифтерін белгілеу мәселелері Қазақстан Республикасының Ұлттық Банкінің құзыретіне жатады. Агенттік банкаралық эквайринг бойынша комиссияларды белгілемейді және төлем жүйелерінің тарифтік саясатын реттемейді", – деп мәлімдеді Қаржы нарығын реттеу және дамыту агенттігінің баспасөз қызметі.
Сондай-ақ агенттік азаматтарды жалған ақпаратқа сенбеуге және тек ресми ақпарат көздеріне ғана жүгінуге үндеді.