Синоптиктердің мәліметінше, ел аумағының басым бөлігінде жаңбыр жауып, найзағай ойнайды.
"Солтүстік-батыс циклоны және онымен байланысты атмосфералық фронттар Қазақстан аумағының басым бөлігіне найзағайлы жаңбыр алып келеді".
Болжам бойынша, кейбір аудандарда нөсер жаңбыр жауып, бұршақ түсуі мүмкін.
"Тек Қазақстанның батысына антициклон сілемі әсер етеді. Соның салдарынан көбіне жауын-шашынсыз ауа райы сақталып, ауа температурасы жоғарылайды. Күндіз термометр бағаны +34...+39°C-ты көрсетіп, қатты ыстық болады", – деп хабарлады "Қазгидромет" РМК баспасөз қызметі.
Бұған дейін 2026 жылғы 21 тамызда Астана, Алматы және Ақтөбеде, ал түнде Атырау, Қарағанды мен Теміртауда қолайсыз метеорологиялық жағдай қалыптасатыны хабарланған еді.