"Славян базары" халықаралық фестивалі жаңа орындаушылардың жұлдызын жақты. Оның ішінде Қазақстанның дарынды әншісі биіктен көрінді деп хабарлайды sputniknews.kz.
Биыл байқауға 21 адам қатысқан. Ширек финалдан соң үздіктер іріктеліп қалды.
Қазір жеңістен үмітті 15 әнші бар. Ал Михаил Финберг жетекшілік еткен Беларусь ұлттық академиялық концерт оркестрі барлық орындаушыларды бірдей сүйемелдеді.
Қазақстанның намысын халықаралық байқауда 23 жастағы Ернар Садырбаев қорғайды, ол көпшілікке Әмре деген атпен кең танымал.
Қазақстандық әншінің байқау көшбасшысы екенін ешкім атап айтпаса да, қазірдің өзінде ол үздік үштік қатарынан орын тепті.
Естеріңізге сала кетсек, биыл "Славян базарының" әділ қазылар алқасында отандасымыз Димаш Құдайберген бар. Кезінде өзі де осы байқауға қатысып, бағы жанған еді. Бәлкім ол өзінің соңынан ерген інілеріне көмектесетін шығар, бірақ тек моральдық түрғыда, рух беру арқылы.