Димаш Құдайберген бүгін Нью-Йорктегі БҰҰ жанындағы Қазақстанның Тұрақты өкілдігінде болып, қазақстандық дипломаттар мен олардың отбасымен кездесті, деп хабарлайды Zakon.kz ҚР СІМ баспасөз қызметіне сілтеме жасап.
"Қазақстан үйіне келгендей болдым ғой", - деп күліп айтты Димаш Қазақстанның Біріккен Ұлттар Ұйымы жанындағы Тұрақты өкілдігіне келгенде.
Ол қазақстандық дипломаттармен емін-жарқын әңгімелесіп, өте қарапайымдылығымен, балаларға деген ерекше ілтипатымен ондағыларды тәнті еткен.
Танымал қазақстандық әнші БҰҰ штаб-пәтерінде де болып, алған әсерлерімен БҰҰ Жаңалықтар қызметімен сұхбатында бөлісті.
Ал ол ертең "Вечерний Ургант" бағдарламасына қатысады.
- Енді 9 сағат ұшу керек, Мәскеуге жетеміз. Сау болыңыздар!, - деп жазды ол Instagram-дағы парақшасында.