Дирофиляриоз - бұрын тек жануарларда кездесетін гельминтоздардың бірі. Соңғы уақытқа дейін бұл ауруға тек жануарлар, әсіресе иттер ғана сезімтал деген пікір болған. Бірақ соңғы жылдары бұл ауруды адамдардың да жұқтыру жағдайлары жиі тіркеле бастады. Адамдарға инфекция қан арқылы жұғады.
Ауру көбінесе масалардың, сирек бүргелердің, қан соратын жәндіктердің басқа түрлерінің шағуы арқылы беріледі. Жұқтыру көзі - үй жануарлары. Ең алдымен иттер, кейде мысықтар. Жануарлардың денесіндегі паразиттер микроскопиялық, ұзындығы 0,3 мм-ге дейінгі, мыңдаған личинка- микрофилярияларды шығарады. Олардың кішкентай болғаны соншалық, қан ағымы мен лимфа ағымы арқылы бүкіл денеге таралады. Осылайша дирофиляриоз жануардан жануарға және адамға беріледі. Инкубациялық кезең 1 айдан бірнеше жылға дейін созылады, ол иммундық жүйеге және паразиттің даму жылдамдығына байланысты. БҚО Санитарлық-эпидемиологиялық департаментінің баспасөз қызметі
Дирофиляриозды барлық жастағы адамдар жұқтыруы мүмкін, дегенмен, жұқтыру қаупі төмендегі адамдарда жоғары:
ит пен мысық өсірушілер;
ашық су қоймалары жанында тұратын адамдар;
табиғатқа жиі шығатын жандар: аңшылар, туристер, бағбандар, балықшылар.
Мамандар "күдікті" шағу, қатты қышу, шағуға тән емес ауырсыну сезімдері, түйін пайда болса, дереу дәрігерге қаралуға кеңес береді.