Осыдан 8 жыл бұрын 25 желтоқсан күні Түркістан облысында ұшақ апатынан 27 әскери қызметші қаза болған еді. Бүгін ҚР Ұлттық қауіпсіздік комитеті Шекара қызметінің барлық аумақтық бөлімшелерінде әріптестерін еске алуға арналған шаралар өтті, деп хабарлады zakon.kz.
ҚР ҰҚК Шекара қызметі Түркістан облысы бойынша департаменті қызметкерлерінің бастамасымен ұшақ апаты болған орынға мемориалды тақта орнатылды. Мемориал басында марқұм болған әріптестердің құрметіне дұға-тілектер бағышталып, гүл шоқтары қойылды.
"2012 жылдың 25 желтоқсаны күні мемлекетімізде қаралы күн жарияланған еді. Қыстың қытымыр күнінде ел астанасынан Шымкент қаласына бет алған ҚР ҰҚК Шекара қызметінің АН-72 әскери ұшағы апатқа ұшырады. Сайрам ауданы Тассай елді мекені маңында орын алған ұшақ апатынан 27 адам қаза тапты. Бұл тәуелсіз ел тарихында болған ең ірі қайғылы оқиға еді", - делінген ҚР ҰҚК Шекара қызметі баспасөз қызметінің хабарламасында.
