ШҚО-дағы Күршім өзені бойында биыл салынған су қоймасының бөгеті жарылып, бірнеше ауылдың егісті алқабы сусыз қалды, деп хабарлайды zakon.kz.
Аltaynews.kz мәліметі бойынша, "Көмейдің" зардабын Бірлік, Сарыөлең және Барақ батыр ауылдарының тұрғындары тартып отыр. Себебі аталған ауылдардың егістігіне қоймаға жиналған су "Жауғашты" каналы арқылы келеді. Биыл қардың аздығынан Күршім өзенінің деңгейі де түсіп кеткен.
Су жиналатын бөгеттің бұзылуы жығылғанға жұдырық болды. Ал "Жауғашты" каналының ұзындығы 25 шақырымдай болады. Биыл дұрыс су жиналмағандықтан мыңдаған гектар алқапқа су жетпей жатыр. Кейбір ауылдың бау-бақшасы қурай бастаған.
- Екінші судан салынған платина жарылып, судың деңгейі ар жаққа ағып кеткен. Бері қарай Жауғашты каналына шығатын деңгейі жоқ. Бұл күрделі жөндеуден 2000 жылдары итальяндық компания өткізген. Табиғи апаттың салдарынан су шайып кетіп отыр. Жауғашты каналына су жетпей азын-аулақ су келіп отыр, - дейді Сарыөлең ауылының тұрғыны Қымбат Қасабаев.
Айта кетейік, 2000 жылдардың басында Италиядан келген инвесторлар дамбыны жөндеген көрінеді. Алайда бұл күнде каналдың тозығы жеткен. Жылда жергілікті тұрғындар өз күшімен дамбыны бітеп әлек болады. Каналдың басында дәл қазір бір ғана трактор жүр. Бірақ суды бітеуге оның күші жетпейді.