Ақмола облысы прокуратурасының 1 тамыз күні мәлімдеуінше, қадағалаушы орган Бас прокурордың тапсырмасы бойынша балаларды сауықтыру орталықтары мен лагерьлерге кешенді тексерулер жүргізген.Тексерудің алдын ала нәтижелерімен санитарлық-эпидемиологиялық заңнама, өрт қауіпсіздігі, еңбек, білім беру, медициналық заңнама және т.б. талаптарының бұзылуы анықталды.
Балаларды сауықтыру орталықтарының бірінде 21 қызметкердің 18-і жұмысқа еңбек шартынсыз және санитарлық кітапшасыз қабылданған. Лагерьде 100 баланың орнына 170 бала қабылданған. Кейбір сауықтыру орталықтарының әкімшілігі балаларды шомылуға тыйым салынған орындарға нұсқаушысыз апарғаны анықталған.
"Балаларды сауықтыру орталықтарының аумағы мен үй-жайларын тексеру кезінде спирттік ішімдіктердің бос бөтелкелері, темекі қораптары, құрамында спирті бар сусындарды өндіруге арналған аппарат, пневматикалық қару, балалар лагерінің ас үй аймағында сақталған тышқанның уы және басқа да тыйым салынған заттар табылды", – делінген облыстық прокуратураның хабарламасында.
Қадағалаушы орган әлі де тексеру іс-шаралары жүріп жатқанын және соның нәтижелері бойынша шара қабылданатынын мәлімдеді.