Атырау облысының ТЖ жөніндегі жедел штабының хабарлауынша, бонның алғашқы партиясы Алмалы елдімекенінде орнатылып жатыр.
"Қатты ағынмен келе жатқан судың толқыны жарды жеп, бөгеттерді бұзып кетпеуі керек. Алмалымен бірге, Бесікті, Талғайраң, Дамбы сияқты ауылдардың жағаларын қорғауымыз қажет. Бонндар, негізінен, мұнай қалдықтарын жинауға қолданылады. Қазіргі уақытта біз бонндарды стратегиялық нысан - су беру стансаларын қорғап қалу мақсатында өзеннің бетіне орнатып жатырмыз. Бонндар мұнай компаниясынан алынуда. Бүгінгі таңда Ақтау қаласындағы резервтердің барлығы Атырауды тасқыннан сақтап қалу үшін пайдаланылып жатыр", - деді генерал-майор Жасұлан Жұмашев.
20 сәуір күнгі мәлімет бойынша, Жайық жағалауының 199 шақырымына бөгет тұрғызылды. Жоспар бойынша Жайық өзені жағалауының 237,6 шақырымына бөгет орнатылуы қажет.
