Зауыт баспасөз қызметінің хабарлауынша, бұған дейін №33 резервуар паркіне тауарлық бензин компоненттерін айдау желісінде зақымдану орны анықталған болатын. Жауапты мамандар құбырды резервуардан ажырату шараларын қабылдады. Төгілген мұнай өнімі сорылып, өңдеуге жіберілді.
"Оқиғаның себептері мен қабылданған шаралар туралы қосымша ақпарат арнайы комиссияның жұмысы аяқталғаннан кейін хабарланады. "АМӨЗ" ЖШС жұмысын штаттық режимде жалғастыруда. Мұнай өнімдерінің негізгі түрлерін өндіру және жөнелту процесі Қазақстан Республикасының Энергетика министрлігі бекіткен жоспарға сәйкес жүргізіліп жатыр", делінген зауыт түсініктемесінде.
Айта кетсек, 10 қаңтарда АМӨЗ-де сатуға дайын тұрған жанар-жағармай толы резервуардың ортайып қалғаны белгілі болды. Ақау анықталып, отынның төгілу жағдайы тоқтатылды. 30 тонна жанар-жағармайдың аққаны анықталды.