Шетелге турлар ұйымдастыратын компанияға клиенттердің жаппай шағымдануы құқық қорғау органдарының назарын аудартты. Қазіргі уақытта полицияға зардап шеккендерден 53 арыз түсті.
Арыз иелері Египет, Түркия, Таиланд, Вьетнам және Қытайға саяхаттар үшін алдын ала төлем жасаған, алайда, уәде етілген қызметтерді ала алмаған. Кейбірі турлардың құнын толық төлесе, басқалары ішінара төлеген. Соған қарамастан, ақшалары қайтарылмаған әрі турлар брондалмағаны белгілі болды.
Клиенттер саяхаттарды агенттік кеңсесіне келіп немесе телефон арқылы брондаған. Төлем қолма-қол және банктік аударым арқылы жүргізілген. Бірақ ұшу күні келгенде, саяхаттарға тапсырыстың мүлде жасалмағаны анықталды. Алдын ала есептеулер бойынша, келтірілген шығын көлемі 40 миллион теңгені құрайды.
Агенттік өкілдері айыптауларға жауап ретінде қаржы иемделмегенін, ал турлар өзіндік құнымен сатылғандықтан, осындай қиындықтар туындағанын мәлімдеді. Полицейлер тергеу барысында туристік пакеттерге қатысты брондауды растайтын ешқандай құжаттардың жоқ екенін анықтады.
Қазіргі уақытта екі немесе одан да көп адамның шығынға ұшырауына байланысты алаяқтық фактісі бойынша сотқа дейінгі тергеу жұмыстары жүргізілуде. Күдікті-жеке кәсіпкер қамауға алынды, тергеу жалғасып жатыр. Полиция осындай жағдайға тап болған барлық азаматтарды құқық қорғау органдарына хабарласуға шақырады.