Ел азаматтары отбасына пәтер сатып алып беру үшін үш күн ішінде 35 миллион теңге қаражат жинаған. Бұл жайлы жергілікті блогер және ерікті Динара Садырбаева өзінің Instagram парақшасында мәлімдеді.
"Біз пәтерді рәсімдедік. Енді сіздердің арқаларыңызда Алинұрдың өзінің пәтері бар. Атсалысқан барлық қазақстандықтарға рахмет айтамын. Мәміле өте жақсы өтті, барлығына қол қойылды, баспананы Алинұрдың өзінің атына рәсімдедік, бірақ ол 18 жасқа толмағандықтан, оның орнына әкесі қол қойды",- деп жазды ол.
Айта кетсек, 2025 жылдың 24 ақпанында әлеуметтік желіде Семейдегі жасөспірімдердің өздерінен төмен сыныпта оқитындарды қалай ұрып-соғып, қорлайтынын сипаттаған видео пайда болды.
25 ақпанда Бала құқықтары жөніндегі уәкіл Динара Зәкиева Абай облысының әкімі Берік Уәлимен кәмелетке толмағандар арасындағы қылмыстың алдын алу мәселелерін және Семейде жасөспірімдер тарапынан жасалған қылмысты талқылағанын айтты.
Ал, 26 ақпанда соққыға жығылған Семейдегі №9 мектептің директоры жұмысынан босатылғаны белгілі болды.