Әкімдіктің мәліметінше, қаланың кейбір аудандарында 36 мм-ге дейін жауын-шашын түскен.
"Бұл әр шаршы метрге 36 литрге дейін жаңбыр суы түсті дегенді білдіреді. Әрине, мұндай көлемдегі жауын-шашын арықтар мен су бұру жүйелеріне түсетін жүктемені едәуір арттырады", – деп хабарлады Алматы әкімдігінің баспасөз қызметі.
Мамандардың айтуынша, кейбір аумақтарда арықтар қоқысқа бітеліп қалған.
"Иә, жекелеген көшелердің кейбір бөліктерін су басты. Қала бойынша коммуналдық қызметтер күшейтілген режимде жұмыс істеді. Мамандар арықтарды қоқыс пен лайдан тазартты, ал су жиналған жерлерде арнайы техниканың көмегімен су сорғызылды", – делінген хабарламада.
Әкімдік бұл жұмыстардың жалғасып жатқанын айтып, тұрғындардан арықтарға қоқыс тастамауды сұрады.
"Құрметті тұрғындар, арықтарға қоқыс тастамауларыңызды сұраймыз. Қаламызға бірге қамқорлық жасап, өзгенің еңбегін құрметтейік", – деп үндеу жасады әкімдіктің баспасөз қызметі.
Бұған дейін 2026 жылғы 11 қарашада Алматыда нөсер жаңбырдан кейін асфальт шөгіп, бірнеше автобустың дөңгелегі шұңқырға түсіп кеткені туралы жазған едік. Сонымен қатар Достық даңғылында тротуар опырылған. Куәгерлер метро станцияларының бірінің су басқан кіреберісін де видеоға түсіріп алған.