Геосаясат па, COVID-19 ба: Путиннің Тоқаевпен және Макронмен кездесуіндегі ерекшеліктер

Әлеуметтік желілер, БАҚ пен Telegram арналарының қолданушылары Ресей президентінің Қазақстан және Франция басшыларымен кездесулерінің жай-жапсарын талқылап жатыр, деп хабарлайды Zakon.kz

Кремль таратқан суреттен Тоқаев пен Путин каминнің жанында, тым жақын отырып сөйлескені, ал бірнеше күн бұрын Макрон Ресей көшбасшысымен келіссөзді тоғыз метрдей қашықтықта отырып жүргізгені байқалды.

10 ақпан күні Қазақстан президенті Қасым-Жомарт Тоқаев Владимир Путиннің шақыруымен Мәскеуге барды. Бұл Тоқаевтың Ресейге Жаңа жылдан кейінгі алғашқы жұмыс сапары болатын. Екі ел басшысы Қазақстандағы қаңтар оқиғасын талқылап, қарым-қатынастарды одан әрі дамыту мәселелерін қарады.

Тоқаев Путинге бітімгерлік контингентін жіберу туралы үндеуіне жауап бергені және лаңкестік әрекеттерді тойтарыс беруде қолдағаны үшін алғыс білдірді.

Келіссөз қорытындысы бойыншаТоқаев пен Путин БАҚ өкілдеріне ортақ мәлімдеме жасады. Кездесу барысында 11 құжатқа қол қойылғаны белгілі болды.

Келіссөздер мен мәлімдеме жасау кезінде екі президенттің арақашықтығы тым жақын болды.

Сурет: Ақорда

Оған қоса, мемлекет басшылары кездесудің басында да, бірлескен мәлімдемеден кейін де қол алысты.

Сурет: Ақорда

Осыдан бірнеше күн бұрын, 7 ақпанда Владимир Путин Франция президенті Эммануэль Макронмен келіссөз жүргізгенде, көрініс басқа болды. Бес сағаттан астам уақытқа созылған келіссөзде Украина мен НАТО-дағы жағдай талқыланды.

Сурет: kremlin.ru

Ресей мен Франция президенттері ұзындығы тоғыз метрдей болатын үлкен үстелдің екі басында отырып сөйлесті. Бұқаралық ақпарат құралдары өкілдеріне ортақ мәлімдеме жасау кезінде де мемлекет басшылары бір-біріне аса жақындаған жоқ.

Сурет: kremlin.ru

Кейбір сарапшылар, саясаттанушылар мен әлеуметтік желі қолданушылары президенттердің бұл арақашықтығынан геосаяси астар іздей бастады.

Дегенмен кейін Макронның бұлай істеуіне басқа жағдайдың себеп болғаны анықталды. Reuters агенттігінің екі дереккөзінің хабарлауынша, Эммануэль Макрон Ресейде ПТР сынамасын тапсырудан бас тарқан.

Осыған байланысты Макронға Ресей тарапынан таңдау беріліпті: не ол ресейлік дәрігерлерге ПТР сынамасын тапсыруға келіседі, не әлеуметтік қашықтықты сақтауы тиіс. Макронның екінші нұсқаны таңдағаны көрініп тұр. Кейін Франция президентімен бірге жүргендер «мемлекет басшысының ДНҚ-сын қалдырғысы келмей», қауіптенгені белгілі болды. Қазақстандық делегацияда мұндай үрей болмаған сияқты.