Пленарлық отырысқа ҚР парламенті мәжілісінің төрағасы Ерлан Қошанов, Мәдениет және ақпарат министрі Аида Балаева, БҰҰ Даму бағдарламасының Қазақстандағы тұрақты өкілі Катарзина Ваверния, үкіметтік емес ұйым өкілдері, жетекшілері, қоғамдық кеңестердің төрағалары, парламент депутаттары қатысты.
"Бүгінде инклюзив ұғымын түсіну мәселесі өткір. Ең бастысы – мүмкіндігі шектеулі жандардың өзін қалай түсінетіні емес, басқалардың мұндай адамдарға қалай қарайтыны. Біз тек қолдау туралы айтып отырған жоқпыз. Біз толыққанды және кедергісіз азамат болу туралы айтып отырмыз. Президенттің қолдауының арқасында үкіметтік емес сектор осы бағытта белсенді жұмыс істеп жатыр", - деді Аида Балаева.
Солардың бірі – "Орда" ҮЕҰ кейінгі 7 жылда аутизммен ауыратын балаларды қолдаудың халықаралық әдістерін сәтті қолданатын "ORDA AUTISM" үш түзету орталығын ашты. Бірлестік жетекшісі Салтанат Есмағанбетова Қазақстандағы 7,5 мың ҮЕҰ-ның халықтың түрлі осал тобымен белсенді жұмыс істеп, оңалту, білім беру және заңгерлік қызметтерді қамтитын кең ауқымды қызметтерді ұсынып жатқанын ерекше атап өтті.
Ол сонымен қатар Қазақстанның Азаматтық альянсы үкіметтің стратегиялық серіктесі және қоғам мен мемлекет мүддесі үшін елдегі экономикалық реформаларды ілгерілету үшін Қазақстанның үкіметтік емес ұйымдардың жалпыұлттық желісінің үйлестірушісі болуға дайын екенін білдірді.
Осыған орай, министр адам құқығын қамтамасыз ету жөніндегі шараларды одан әрі ілгерілетудің маңызына тоқталып, мемлекеттің елеулі өзгерістерге дайын екенін көрсететін "Азаматтардың құқығы мен бостандығын одан әрі қамтамасыз ету жөніндегі бірінші кезектегі шаралар жоспарының" сәтті жүзеге асып жатқанын атап өтті.
