Бұл маңызды оқиға 2026 жылғы әлем чемпионатына іріктеу турнирінің тоғызыншы турында болды. Тимур Кападзенің шәкірттері сырт алаңда Біріккен Араб Әмірліктері құрамасымен 0:0 есебімен тең ойнап, керек нәтижеге қол жеткізді.
Осылайша, өзбек футболшылары өз тобында кем дегенде екінші орын алып, Азия құрлығынан тікелей әлем чемпионатына жолдама алды.
Тарихи жетістікті көрші ел халқы зор қуанышпен қабылдап жатыр. Өзбекстан президенті Шавкат Мирзиеев өз құттықтауын жолдады.
"Қымбатты ұлдарым! Сіздер Азияның ең мықты командаларына қарсы іріктеу матчтарында нағыз ерлік пен табандылық танытып, ел тарихында алғаш рет әлем чемпионатына жолдама алдыңыздар. Осы үлкен жеңіспен шын жүректен құттықтаймын. Бұл — сөзсіз, ұлттық спорт шежіресіне алтын әріптермен жазылатын жарқын жетістік. Миллиондаған отандастарымыз, футбол жанкүйерлері дәл осындай нәтиже туралы армандап келді. Бұл — Құрбан айттың қасиетті күндерінде халқымызға тарту еткен шын мәніндегі сый. Жеңісті жолдарыңыз жалғасын таба берсін!" - деді президент Шавкат Мирзиеев.
Осылайша, Өзбекстан құрамасы өз тарихында алғаш рет 2026 жылы үш ел аумағында өтетін әлем чемпионатына қатысады.