Шымкентте Отан қорғаушылар күніне арналған салтанатты жиын өтті
Сурет: Шымкент қаласы әкімдігінің баспасөз қызметі
Салтанатты жиынға Шымкент қаласының әкімі Мұрат Әйтенов қатысып, жауынгерлерді мерекесімен құттықтады.
"Бұл – халқымызға тән батырлықтың және Отансүйгіштіктің мерекесі. Бабаларымыз ақ білектің ұшымен, ақ найзаның күшімен кең байтақ даламызды қорғап, бүгінгі ұрпаққа аманаттап қалдырған. Бабалардың аманатына адал болу – бүгінгі ұрпақтың перзенттік парызы.Себебі, тарих қойнауындағы ерлікке толы жеңісті жолымыз ұрпақ жадында мәңгі сақталуы тиіс". Шымкент қаласының әкімі Мұрат Әйтенов
Сурет: Шымкент қаласы әкімдігінің баспасөз қызметі
Сондай-ақ қала әкімі биыл Қазақстан Қарулы Күштерінің құрылғанына 31 жыл толып отығанын, осы жылдар ішінде ұлттық армиямыз түрлі даму сатыларынан өтіп, жылдан жылға қуаты артып келе жатқанын атап өтті.
"Бүгінде дайындық деңгейі жоғары, жауынгерлік рухы асқақ, заманауи қару-жарақ және әскери техникамен жабдықталған. Бір ауыз сөзбен айтсақ, айбынды армиямыз – тұғырлы Тәуелсіздігіміз мен мемлекетіміздің берік қорғаны болып табылады", - деді Мұрат Дүйсенбекұлы.
Сурет: Шымкент қаласы әкімдігінің баспасөз қызметі
Әйтеновтің айтуынша, әлемде қалыптасқан геосаяси ахуал ел Тәуелсіздігі мен территориялық тұтастықты қорғауды, ұлттық қауіпсіздікті қамтамасыз етуді қай кездегіден де өзекті мәселеге айналдырып отыр.
"Отан қорғау – перзенттік парыз, мәртебелі міндет. Еліміздің тыныштығы мен жеріміздің тұтастығын сақтау жолында қалтқысыз қызмет етіп жүрген ержүрек жауынгерлеріміздің еңбегі ерен. Халқымыз антына адал, сертіне берік перзенттерін қадір тұтады". Шаһар басшысы Мұрат Әйтенов
Салтанатты жиында қала әкімі Мұрат Әйтенов бірқатар әскери қызметкерлерді Алғыс хатпен марапаттады.
Сурет: Шымкент қаласы әкімдігінің баспасөз қызметі
Сонымен қатар жиында "Оңтүстік" өңірлік қолбасшылығы әскерлерінің қолбасшысы, генерал-майор Мереке Көшекбаев Қарулы күштердің ардагерлері мен жауынгерлерді мерекесімен құттықтап, мінсіз қызмет атқарған сардарлар мен сарбаздарды марапаттады.
Жиынның соңы Шымкент әскери гарнизоны сарбаздары, қаладағы әскери оқу орындары курсанттары мен эстрада жұлдыздары қатысқан мерекелік концертке ұласты.
