Биыл Сәтбаев және Абай атындағы университеттер үшін жаңа жатақхана құрылысы басталады
Сурет: pixabay
Жобалық кеңсенің негізгі міндеті - Алматы аумағында жатақханалар салу және студенттерді тұрғын үймен қамтамасыз ету жөніндегі мемлекеттік бағдарламаны іске асыру үшін қолайлы жағдай жасау, атап айтқанда, қала әкімдігі мен Қаржы орталығы тарапынан тұрғын үй салуға мүдделі жоғары оқу орындары мен әлеуетті инвесторларға жедел заңгерлік, консультациялық және сараптамалық қолдау көрсету.
"Бүгін халық ең тығыз орналасқан қала – Алматыда жобалық кеңсе өз есігін ашты, енді осындай кеңселерді жатақханаларға қажеттілік бар басқа қалаларда, атап өтсем, Астана, Ақтөбе және Шымкентте ашуды жоспарлап отырмыз". Министр Саясат Нұрбек
Ғылым және жоғары білім министрлігінің баспасөз қызметінің хабарлауынша, Алматыны дамытудың 2025 жылға дейінгі бағдарламасы шеңберінде 12 мың төсек-орынға, ал 2030 жылға дейін тағы 20 мың орынға жатақхана салу жоспарланып отыр.
Жобалық кеңседе министрліктің, Қаржы орталығының және әкімдіктің түрлі басқармаларының өкілдері тұрақты негізде отырады. Олар күн сайын ХҚКО режимінде университеттерге, құрылыс компанияларына және мердігерлерге кеңес береді.
Бұл бағыттағы алғашқы қадам ретінде 2023 жылы Satbayev University үшін екі жаңа жатақхана салу туралы меморандумға қол қойылды. Сонымен қатар Абай атындағы ҚазҰПУ үшін 140 орындық жатақхана құрылысы өз жұмысын бастайды.
Бүгінгі таңда жобалық кеңсе базасында 50 инвестор бар, олардың бесеуі түрлі мәселелер бойынша тығыз жұмыс істейді.
Жобалық офис Алматы қаласы Байтұрсынов көшесі 22 мекенжайында орналасқан. Барлық сұрақ бойынша Алматы қаласы Жастар саясаты басқармасына хабарласуға болады.
