Қазақстаннан 100 млн теңге мен алтын құйманы заңсыз алып шықпақ болған азамат тұтылды

Астана қаласы бойынша Мемлекеттік кірістер департаменті кедендік бақылауды жүзеге асыру кезінде 100 млн теңгеден астам сомаға ақшалай қаражатты, сондай-ақ 1 құйма тазартылған алтынды заңсыз әкету әрекетін анықтады, деп хабарлайды Zakon.kz.

Бұл туралы ҚР ҚМ Мемлекеттік кірістер комитеті "Астана-Ауежай" кедендік бекетіндегі сәуір мен мамыр айлары аралығында жүргізілген жұмыстарды қорытындылай отырып, мәлімдеді.

Мысалы, Астана қаласы бойынша Экономикалық тергеу департаментімен бірлесіп жүргізілген іс – шаралардың нәтижесінде "Астана-Анталия" әуе рейсін тексеру кезінде 118 392 АҚШ доллары, 28 750 рубль, 92 885 еуро сомасында декларацияланбаған қолма-қол ақшасы табылған азамат тоқтатылды.

Астана қаласы бойынша МКД жеке тұлғаларға Қазақстан Республикасынан 10 000 АҚШ доллары баламасынан асатын сомадағы қолма-қол шетел валютасын және шетел валютасындағы ақша құралдарын әкетуге, сондай-ақ тазартылған алтынды әкетуге тыйым салынатыны туралы еске салады.