Жұмыс істеп тұрған тоғыз банктің таратылатыны рас па – Қаржы нарығын реттеу агенттігі түсініктеме берді

Банкс секторы, екінші деңгейлі банктер, ҚР Қаржы нарығын дамыту агенттігі, сурет - Zakon.kz жаңалық 25.07.2023 18:29

Сурет: pixabay

ҚР Қаржы нарығын реттеу және дамыту агенттігі әлеуметтік желілер мен БАҚ-та таратылып жатқан Қазақстанда жұмыс істеп тұрған 9 банкті тарату туралы ақпарат шындыққа сәйкес келмейтінін мәлімдеді, деп хабарлайды Zakon.kz.

Агенттіктің мәліметінше, қазіргі уақытта Қазақстан Республикасының банк секторында 21 екінші деңгейдегі банк бар, оның ішінде 12 банк шетелдің қатысуымен, оның 8-і – еншілес банк.

"Бұл банктерден басқа тағы тоғыз банк 2007 жылдан бері тарату процесінде", – делінген агенттіктің сайтында 2023 жылғы 25 шілде күні жарияланған хабарламада.

Ведомство тарату процесінде тұрған бұл тоғыз банктің лицензиялары 2007 жылдан 2021 жылға дейінгі кезеңде кері қайтарып алынғанын атап өтті, атап айтқанда:

"Валют-транзит банк" (тарату – 2007 жылғы 1 наурыздан бастап);
"Қазинвестбанк" (2018 жылғы 24 қаңтардан бастап);
Delta Bank (2018 жылғы 25 сәуірден бастап);
Qazaq Banki (2018 жылғы 12 желтоқсаннан бастап);
"Астана Банкі" (2019 жылғы 9 қаңтардан бастап);
"Эксимбанк Қазақстан" (2019 жылғы 16 қаңтардан бастап);
Tengri Bank (2021 жылғы 15 ақпаннан бастап);
AsiaCredit Bank (2021 жылғы 22 шілдеден бастап);
CapitalBank Kazakhstan (2021 жылғы 5 қазаннан бастап).

"Таратылатын банктердің тарату өндірісінің барысы туралы ақпарат тоқсан сайын Агенттіктің ресми сайтында «Қаржы нарықтары - Банк секторы - Тарату процесі - Тарату процесінің ағымдағы мәртебесі туралы ақпарат» бөлімінде орналастырылады (2023 жылғы 1 шілдедегі жағдай бойынша таратылатын банктер бойынша өзекті ақпарат сайтта 2023 жылғы 14 шілдеде орналастырылды)".ҚР Қаржы нарығын реттеу және дамыту агенттігі

Осыған байланысты, Агенттік өкілдерінің мәлімдеуінше, тарату процесінің жұмыс істеп тұрған 21 екінші деңгейдегі банкке қатысы жоқ, лицензиялары 2007-2021 жылдары қайтарып алынған басқа тоғыз банкке қатысты жүргізіледі.

"Жұмыс істеп тұрған 21 екінші деңгейдегі банктен лицензияларды кері қайтарып алу жоспарланып отырған жоқ".ҚР Қаржы нарығын реттеу және дамыту агенттігі

Агенттік "бүгінгі күні банк секторы тұрақты, банктер барлық пруденциялық нормативтерді орындап жатқанын" атап өтті:

банк секторының активтері 46,6 трлн теңгені құрайды. Екінші деңгейдегі банктерде 13,7 трлн теңгені немесе жиынтық активтердің 29,4%-ын құрайтын өтімділігі жоғары активтердің елеулі қоры бар. Бос өтімділіктің болуы банктерге өз міндеттемелерін толық көлемде орындауға мүмкіндік береді;
банк секторының меншікті капиталы 5,7 трлн теңгені құрады. Банктердің негізгі капиталының жеткіліктілік коэффициенті (k1) 18,6%-ды, меншікті капиталының жеткіліктілік коэффициенті (к2) 21,4%-ды құрады, бұл заңнамада белгіленген нормативтерден (min. тиісінше 5,5% және 8%) айтарлықтай асып кетеді және банк секторындағы ықтимал тәуекелдерді өтеуді қамтамасыз етеді;
кредит портфелінің сапасы тұрақты болып қалып отыр. Жұмыс істемейтін NPL қарыздардың үлесі несие портфелінің 3,6%-ын құрады. Жұмыс істемейтін кредиттерді провизиялармен өтеу жоғары деңгейде қалып, 77,4%-ды құрайды.