Өңірлер бойынша жалақы қаншалықты өсті
Сурет: Zakon.kz
Ұлттық статистика бюросының ақпараты бойынша, Қазақстан Республикасы бойынша атаулы жалақының орташа мәні 2024 жылғы II тоқсанда 403 251 теңгені құрады. 2023 жылдың тиісті тоқсанына қарағанда өсім – 10,3%, нақты мәнде 1,7% өсті. Алайда, аймақтар мен экономикалық қызмет түрлері бойынша орташа жалақы деңгейі жалпыұлттық деңгейден айтарлықтай ерекшеленеді.
Мысалы, ең жоғары орташа айлық жалақы Атырау облысында тіркелген - 594 426 теңге, бұл 2023 жылдың екінші тоқсанымен салыстырғанда 3,67% - ға жоғары. Бұл ретте ағымдағы жылдың бірінші тоқсанымен салыстырғанда өңірдегі орташа жалақы 1,6% - ға төмендеді.
Екінші орында – Маңғыстау облысы - 579 838 теңге. Өткен жылдың ұқсас тоқсанымен салыстырғанда 9,15% - ға өсім бар. Ең жоғары орташа жалақы бойынша үздік үштікті Ұлытау облысы аяқтайды - 522 988 теңге немесе 2023 жылдың екінші тоқсанындағы көрсеткішпен салыстырған кезде + 10,23%.
Ең төменгі жалақы деңгейі Жетісу облысында - 300 393 теңге, бұл республикалық мәннен 25,5% - ға төмен. Ал, Солтүстік Қазақстан облысында орташа жалақы деңгейі - 297 303 теңге.
Қызмет салалары бойынша ең жоғары жалақы
Салалар бөлінісінде ең жоғары жалақы қаржы және сақтандыру қызметі секторы – 878 739 теңге немесе ел бойынша орташа көрсеткіштен 2,2 есе жоғары. Екінші орында – тау-кен өнеркәсібі және карьерлерді қазу, онда екінші тоқсандағы орташа жалақы 797 618 теңгені құрады. Бұл республика бойынша 97,8% -ға артық. Үшінші орынды 661 339 теңге көрсеткішімен байланыс және ақпарат саласы алады.
Ең төмен ақы төленетін салалар -ауыл, орман және балық шаруашылығы – 251 301 теңге, бұл орташа жалақыдан 37% -ға төмен. Сондай-ақ өнер, ойын-сауық және демалыс бойынша екінші тоқсандағы жалақы 260 949 теңгені құрады. Айтпақшы, өткен жылдың осы кезеңімен салыстырғанда осы салалардағы жалақы тиісінше 11,7% және 21,5% -ға өсті.
