Көлік полицейлері елордаға героин жеткізу арнасының жолын кесті
![Есірткі тасымалдары, сурет - Zakon.kz жаңалық 15.02.2022 09:38](https://kaz.zakon.kz/pbi/WEBP/2023-12-20/file-a853c9e0-0abf-4bde-81af-c94159ae9612/800x451.webp)
Polisia.kz мәліметінше, көлік полицейлері елордаға героин жеткізу арнасының жолын кесті.
Көлік полициясының қызметкерлері ұзақ уақыт бойы Нұр-Сұлтан қаласында героин таратумен айналысқан тұрақты қылмыстық топты жойды.
Осылайша, жедел іс-шаралар нәтижелері бойынша 5 есірткі сатушы – Нұр-Сұлтан қаласының 28-57 жас аралығындағы тұрғындары ұсталды.
ІІМ Есірткі қылмысына қарсы іс-қимыл департаменті бастығының орынбасары Асқар Мұхаметқалиевтің айтуынша, аталған факті бойынша ҚР ҚК 297-бабы (Есірткі құралдарын, психотроптық заттарды, олардың аналогтарын өткізу мақсатында заңсыз дайындау, өңдеу, сатып алу, сақтау, тасымалдау) бойынша бірқатар қылмыстық істер қозғалды. Ұсталғандар УҰИ-ға қамалды.
Алынған героиннің жалпы салмағы шамамен 140 граммды құрады.
Айта кету керек, бұл ауыр есірткінің аса ірі салмағы 1 граммнан басталады, оның заңсыз айналымы үшін мүлікті тәркілей отырып, 10 жылдан 15 жылға дейінгі мерзімге бас бостандығынан айыру жазасы қарастырылған.
Героин – ауыр түрлерге жатады, апиын көкнәрінен алынатын күшті есірткі болып табылады, оны шамадан тыс қолдану салдарынан әлемде жыл сайын 100 мыңға дейін есірткіге тәуелді адамдар қайтыс болады.