Алматылықтар саяси қуғын-сүргін және ашаршылық құрбандарын еске алды

Алматыдағы Қарағайлы саябағында 1930 жылдардағы ашаршылық құрбандарына арналған ескерткішке гүл қойылды. Тарихқа сүйенсек, 1931-1933 жылдар аралығында ашаршылықтан 1,7 миллионға жуық адам қайтыс болған, деп хабарлайды Zakon.kz.

Саябақтағы 1930 жылдардағы ашаршылық құрбандарына арналған ескерткіш-мемориал 2016 жылы Қазақстанның тұңғыш президенті Нұрсұлтан Назарбаевтың бастамасымен салынған.

Сурет: Zakon.kz

Эскиз жобасының авторлары: Дулат Үсенбаев, Айдос Бүркітбаев және Қанат Бегулиев.

Сурет: Zakon.kz

Қуғын-сүргін құрбандарын еске алуға арналған ескерткіш «Ана» деп аталады. Ескерткіш аштықтан қажыған баланы кеудесіне қысып алған ана бейнесінде жасалған.

Сурет: Zakon.kz

Алматыдағы гүл қою рәсіміне Алматы әкімі Ерболат Досаев қатысты. Сонымен қатар іс-шараға саяси қуғын-сүргін және ашаршылық құрбандарының туыстары мен жақындары, мәдениет қайраткерлері, қоғам өкілдері қатысты. Нөсер жаңбырға қарамастан, еске алу күні рәсіміне қаланың 100-ден астам тұрғыны жиналды. Олар қаза болғандарды бір минут үнсіздікпен еске алып, ескерткішке гүл қойды.

Сурет: Zakon.kz

Еске алу шарасы барысында жазушы Смағұл Елубай, ҚР Ұлттық Ғылым академиясының академигі, саяси қуғын-сүргін құрбандарын толық оңалту жөніндегі мемлекеттік комиссияның мүшесі Хангелді Әбжанов, кинорежиссер Геннадий Земель сөз сөйледі. Еске алу шарасына қатысушылар қайғылы оқиғаларды есте сақтап, саяси қуғын-сүргін құрбандарын ақтау бойынша жұмысты жалғастыру қажет екенін айтты.

Сурет: Zakon.kz

Қазақстанда Саяси қуғын-сүргін құрбандарын еске алу күні 1997 жылы бекітілді.

1918-1933 жылдар аралығында Қазақстанда түрлі деректер бойынша 3 миллионнан астам адам, оның ішінде 1931-1933 жылдар аралығында 1,7 миллионға жуық адам қайтыс болды.

1937-1938 жылдары 100 мыңнан астам қазақстандық қуғын-сүргін құрбаны болды.

Сурет: Zakon.kz

Бүгін Алматыда естелік іс-шаралар, соның ішінде «дөңгелек үстелдер» форматындағы конференциялар, тарихи-ағартушылық дәрістер, театрландырылған қойылымдар, кітапханаларда фото және кітап көрмелері, жастардың зиялы қауым өкілдерімен кездесулері және тағы басқа жиындар өтіп жатыр.