Нұржан Нұржігітов «Баркуаб» көне қалашығының қазба жұмыстарымен танысты
Сурет: Жамбыл облысы әкімінің баспасөз қызметі
Жамбыл облысы әкімінің баспасөз қызметі таратқан ақпаратқа сай, тарихи қалашықтағы қазба жұмыстары 2018 жылы басталған. Оған дейін мұнда тек барлау экспедициялары жүргізілген. Бүгінде қалашықтың құпиясын ашу мақсатында да бірқатар жұмыстар атқарылуда.
Сурет: Жамбыл облысы әкімінің баспасөз қызметі
Бұл ретте «Арк ғылыми ұйымы» жауапкершілігі шектеулі серіктестігінің директоры Ескендірбек Төрбеков 2018-2019 жылдар аралығында біздің дәуірімізге дейінгі II ғасыр – біздің дәуіріміздің V ғасыры, біздің эрамызға дейінгі VI - XIII ғасырларға жататын 3000-нан астам артефактілер табылғанын жеткізді. Сонымен қатар, аталған елдімекеннен керамикалық ыдыстар, керамика фрагменттері, ұн тартқыштар және тасты диірмендер табылған. Археологиялық жұмыстар облыстық бюджеттен бөлінген қаражат есебінен жүргізілуде.
Аймақ басшысы артефактілермен танысып, қазба жұмыстар мен атқарылған бөліктерді аралап көрді.
Сурет: Жамбыл облысы әкімінің баспасөз қызметі
Мұнда аса бүлінбеген қабырғалар, күмбез түріндегі төбелер, кең дәліздер және шағын бөлмелер барынша сақталған. Қазба жұмыстары барысында астыңғы қабатынан 12 метрлік құдық табылған. Бірнеше бидай сақтайтын қамбаның орындары анықталған. Сондай-ақ бұл тарихи орыннан көмір қалдықтары да кездеседі.
Нұржан Нұржігітов көшпелі ата-бабаларымыздың ежелгі және ерекше өркениеті әлем тарихында үлкен маңызға ие екенін айтып, бұл аталған қалашық аумағындағы қазба жұмыстары барысында тағы бір дәлелденіп отырғанын атап өтті. Осы бағытта қазба жұмыстарын жемісті жалғастыру үшін биыл тағы облыстық бюджеттен тиісті қаражат қаралатынын айтты.
Сурет: Жамбыл облысы әкімінің баспасөз қызметі
Біз тарихи жәдігерлерімізді жаңғыртуға тиіспіз. Рухани құндылықтарымызды, өткеннің өнегесін ұрпақ бойына сіңіру маңызды. Тарихымызды таныту арқылы туризмді дамытуға да күш салу керек. Жамбыл облысының әкімі Нұржан Нұржігітов
Айта кетейік, «Баркуаб» археологиялық қалашығы Жамбыл облысының киелі жерлерінің географиясына енетін Қазақстанның оңтүстігіндегі Ұлы Жібек Жолының солтүстік тармағының бойындағы негізгі туристік нысандар тізіміне кірген.
