Орал қаласының мұғалімдеріне құрмет көрсетілді
Сурет: Орал қаласы әкімінің баспасөз қызметі
Орал қаласы білім беру бөлімінің ұйымдастыруымен өткен шара ұлт ұстазы Ахмет Байтұрсынұлының 150 жылдығына арналған шағын қойылыммен басталды. Қала әкімі Миржан Сатқанов педагогтер мен сала ардагерлерін кәсіби мерекемен құттықтады.
Сурет: Орал қаласы әкімінің баспасөз қызметі
Қаламыздағы білім беру ұйымдарында 7 мыңға жуық педагог қызмет етеді. Олар келешекте еліміздің дамуы жолында үлес қосатын 58 мыңдай шәкірт тәрбиелеуде. Қала командасы пәндік олимпиадада облыс командалары арасынан тұрақты түрде бірінші орын алады. Ә.Молдағұлова атындағы №38 мектеп-лицей республикалық олимпиадада жоғары нәтиже көрсеткені үшін еліміздегі үздік 100 мектептің қатарында болса, М.Мәметова атындағы №27 мектеп-лицей ұлттық бірыңғай тестілеу нәтижесінде үздік 100-дікте. Қасым-Жомарт Кемелұлы «Болашаққа жол сілтейтін мұғалімнің еңбегін лайықты бағалау – өте маңызды міндет» деп мәртебелі мамандық иесі беделінің жоғары болуы керектігін айтты. Бұл бағытта мұғалімнің мәртебесін биіктетуге арналған шаралар, жергілікті атқарушы құрылым тарапынан ынталандыру жұмыстары жалғаса бермек, -деп атап өтті қала әкімі.
Салтанатты шарада «Орал қаласының құрметті педагогі» байқауының иегері анықталып, үздік ұстаздар марапатталды. Жергілікті атқарушы құрылым педагогтерді ынталандыру мақсатында үшінші рет өткізген байқауға биыл 40-тан астам мұғалім қатысты. Кәсіби шеберлігі шыңдалған, шәкірт тәрбиелеуде біраз жетістікке жетіп үлгерген Эстетикалық бағыттағы мектеп-гимназияның бастауыш сынып мұғалімі Ақгүл Рахметова «Орал қаласының құрметті педагогі» атағына лайық деп танылды.
Сурет: Орал қаласы әкімінің баспасөз қызметі
Шаһар басшысы жеңімпазға төсбелгі мен куәлігін ұсынып, 954 мың теңге сыйақы сертификатын табыстады. Қаламыздағы білім ошақтарында елеулі еңбек етіп жүрген бірнеше ұстаз құрметке бөленіп, түрлі аталымдардың иесі атанды. Олардың қатарында№42 «Ақ ниет» гимназиясының математика пәнінің мұғалімі Дамира Канатбаева, №41 мектеп-лицейінің тарих пәнінің мұғалімі Эльмира Орынбасарова, №47 мектебінің директоры Нұрлан Саттықов, Ә.Молдағұлова атындағы №38 мектеп-лицей мұғалімі, педагог-шебер Гүлзиһан Тасқарина және басқа ұстаздар бар.
