Ақтөбе облысында мүгедектігі бар адамдардан пара алған шенеунік ұсталды

Ақтөбе облысы бойынша сыбайлас жемқорлыққа қарсы қызмет Ақтөбе облысы бойынша еңбек және халықты әлеуметтік қорғау комитеті департаментінің № 4 медициналық-әлеуметтік сараптама бөлімінің басшысына қатысты қылмыстық істі тергеп жатыр, деп хабарлайды Zakon.kz.

Сыбайлас жемқорлыққа қарсы іс-қимыл агенттігі таратқан ақпарат бойынша, ол медициналық-әлеуметтік сараптамадан өту кезінде мүгедектерден мүгедектік мерзімін белгілеу және ұзарту үшін бірнеше рет жалпы сомасы 1 200 000 теңге пара алды деген күдікке ілінді.

"Тергеу соты күдіктіні "электрондық білезікті" қолдану арқылы "үйқамақ" түріндегі бұлтартпау шарасына санкциялады".Сыбайлас жемқорлыққа қарсы іс-қимыл агенттігі

Ведомство өкілдері тергеу жүріп жатқанын нақтылады.

Тергеу мүддесі үшін өзге ақпарат жария етілмейді.

Сондай-ақ Түркістан облысында полиция бастығының бұрынғы орынбасары алаяқтық жасады деген күдікке ілінді.