"Қазақстан кітапханасы" мәтін терушілерді жұмысқа алып жатыр: елде алаяқтықтың жаңа түрі пайда болды

"Қазақстан кітапханасы", жалған ақпарат, мәтін теруші, сурет - Zakon.kz жаңалық 22.02.2023 11:51

Сурет: freepik

Қазнетте компьютерде мәтін теру арқылы көп ақша табуға болатыны жайлы жарнамалар шықты. Мұндай мамандар "Қазақстан кітапханасына" қажет-мыс. Алайда бұл шындыққа жанаспайды, деп хабарлайды Zakon.kz.

Stopfake.kz басылымы жарнамадағы "Қазақстан кітапханасы" деген атауға назар аудартады.

Елімізде ондай кітапхана жоқ, демек, іс жүзінде жоқ кәсіпорын қызметкерлерді қабылдай алмайды.

Видеода көзілдірік киген ақ шашты әйел мол табыс табу туралы айтады. Оның фотосуретін желіден іздестіргенде, 2022 жылы ол күмәнді риэлторлардың қызметін жарнамалағаны анықталды. Сондай-ақ ол өзін бастауыш сынып мұғалімі ретінде таныстырып, мәтін теру арқылы 23 мың рубль тапқаны туралы айтқан видео тарады. Демек, ол алдын ала дайындалған мәтінді оқитын актриса болуы мүмкін.

Мәтін теріп, көп ақша табу – алаяқтардың айла-амалдарының бірі. Олар әдетте нақты жұмыс берушілерге қарағанда әлдеқайда жоғары жалақы төлеуге уәде етеді. Ал қызмет үшін ақы төлейтін кезде, олар алдымен "кепіл" ретінде аз мөлшерде ақша жіберуді сұрайды. Аударманы алғаннан кейін, алаяқтар байланысты тоқтатады.

Басылым таралған ақпарат – алаяқтардың ісі деген қорытынды жасады. Мұндай ұсыныстарға сенбеген дұрыс.

Оқи отырыңыз