7 жастағы бала Бадам өзеніне батып кете жаздады

Бадам өзені, сурет - Zakon.kz жаңалық 28.07.2023 23:17

Сурет: Шымкенттің төтенше жағдайлар департаменті

Шымкентте Бадам өзенінде шомылып жүрген 7 жасар бала суға батып кете жаздады. Оқиға кеше, 27 шілдеде болған, деп хабарлайды Zakon.kz.

Мектеп жасындағы бала өзге балалармен бірге өзендегі каскадты тірек құрылымының жоғарғы бөлігінде шомылып жүрген. Кенеттен оның аяғы тайып кетіп, тіреуіштің түбіне құлап шыға алмай қалған.

Дәл сол сәтте өзен аумағында Тұран аудандық төтенше жағдайлар басқармасының қызметкерлері судағы қауіпсіздік бойынша рейдтік іс-шаралар өткізіп жүрген екен. Азаматтық қорғау капитаны Рауан Ордабек рейд барысында баланы дер кезінде көріп, дереу көмекке келген. Содан оқушыны қауіпсіз жерге арқалап шығарды. Балаға медициналық көмек қажет болмаған.

Төтенше жағдайлар департаментінің мәліметінше, Бадам өзенінде бұл аймақта шомылуға тыйым салынған және өмірге қауіп төндіретін аумақ саналады.

Жалпы қала бойынша шомылуға тыйым салынған 13 орын анықталған.

Оқи отырыңыз