Дархан Қыдырәлі: Биыл еліміздегі бірінші сынып оқушыларының 70%-ға жуығы қазақша білім алуды таңдаған

Дархан Қыдырәлі, сурет - Zakon.kz жаңалық 21.08.2023 22:17

Сурет: видео скрині

Ақпарат және қоғамдық даму министрі Дархан Қыдырәлі "Өзекті" YouTube-жобасына берген сұхбатында осылай деді.

"Биыл мектеп табалдырығын аттайтын балалардың 70 пайызы қазақ сыныбына баруды таңдаған. Тек білім саласында емес, кез келген салада қазақ тіліне сұраныстың күрт өскенін көріп отырмыз. Жалпы, қазақ тілі қазір еліміздегі түрлі этнос өкілдері арасында трендке айналды. Бүгінде орташа есеппен ақпарат саласы аудиториясының 85 пайызы мемлекеттік тілдегі өнімді тұтынып отыр. Ал 14-35 жас арасындағы жастар интернет кеңістікте 70 пайыздан астам контентті қазақ тілінде іздеген", - деді Қыдырәлі.

Министрдің айтуынша, қазақ тіліндегі телевизиялық өнімдерге шетелде сұраныс көп.