Батыс Қазақстан облысында big bag шығаратын зауыт ашылды
Сурет: Батыс Қазақстан облысы әкімдігінің баспасөз қызметі
Өндіріс құруға 3 миллион АҚШ долларынан астам инвестиция бөлінген. Зауыттың ашылуы облыстағы өнеркәсіп өнімі мен экспорт көлемін ұлғайтып қана қоймай, салық базасын ұлғайтып, 100-ден астам жұмыс орнын ашуға, сол арқылы облыс тұрғындарын жұмыспен қамтуға мүмкіндік береді.
Сурет: Батыс Қазақстан облысы әкімдігінің баспасөз қызметі
"Мемлекет басшысы Қасым-Жомарт Тоқаев Үкіметке мемлекет экономикасын дамыту үшін инвестиция тартуды қамтамасыз етуді тапсырды. Осы мақсатқа жету үшін бар күш-жігерімізді салуға тырысамыз. Өткен жылмен салыстырғанда облысқа инвестиция тарту 27 пайызға артып, 430 миллиард теңгені құраған. Жыл соңына дейін негізгі капиталға инвестиция көлемі 600 млрд теңгеге дейін ұлғайтылады. Бүгін біз облыста жаңа big bag шығаратын зауыт аштық. Жұмысты бастамас бұрын зауыт басшылығының алдына зауытты Батыс Қазақстан облысы аумағында тіркеу, жергілікті кадрларды оқыту және жұмысқа орналастыру, жұмысшыларға қауіпсіз еңбек жағдайлары мен лайықты еңбекақы төлеу секілді үш шарт қойылды. Зауыт қазірдің өзінде еліміздің басқа аймақтарына және ЕО-ның 20-дан астам елдеріне экспорттау үшін өз өнімдерін шығара бастады", - деді облыс әкімі Нариман Төреғалиев.
Сурет: Zakon.kz
Зауытта сапалы өнім шығаруға мүмкіндік беретін жаңа заманауи жабдықтар орнатылған. Алғашқы өнім Еуроодақ елдері мен Ресейге экспортқа жөнелтіліп, қазіргі күнде Қазақстанның өнеркәсіптік кәсіпорындарымен келіссөздер жүргізіліп жатыр. Зауыттың жобалық қуаты жылына 5 миллион big bag пен 60 мың вагон лайнерін құрайды. Компания Қазақстан мен Еуропа елдерінің өнеркәсіптік кәсіпорындары мен логистикалық компанияларына полимерлі қаптамаларды жеткізеді. Негізгі клиенттері – химия кәсіпорындары, минералды тыңайтқыштарды өндірушілер, ауылшаруашылық холдингтері, орауыш дистрибьюторлар, орау терминалдары, цемент және тұз өндірушілер болып табылады. Зауытта барлық стандарттар мен мемлекеттік бағдарламаларға, оның ішінде экспортты дамытуға сай келетін заманауи қондырғылар орнатылған. Компанияның өнімдерін сатып алуға дайын Норвегия мен Польшадан әлеуетті тұтынушылар бар.
Сурет: Батыс Қазақстан облысы әкімдігінің баспасөз қызметі
Аймақ басшысы атап өткендей, өңірдің әлеуметтік-экономикалық көрсеткіштерін жақсарту үшін ауыл шаруашылығы саласына, өнеркәсіптік өндіріске, ет өңдеуге, құрылыс материалдарын өндіруге инвесторлар тарту бойынша ауқымды жұмыстар жүргізіліп жатыр. Қазір өңірде өз кәсіпорынын ашуға дайын бірнеше инвестициялық компаниялар бар.
