Еліміз қашан аппақ қарға оранады
Сурет: Zakon.kz
"Қазгидромет" РМК ұсынған мәлімет бойынша, желтоқсан айының басында Қазақстанның басым бөлігінде жауын-шашын (жаңбыр, қар) жауады, сондай-ақ тұман, көктайғақ болады, ал солтүстік өңірлерде бұған қоса ұйытқыған жел мен жаяу бұрқасын соғады деп болжанып отыр.
"Желтоқсанның бірінші онкүндігінің екінші жартысында оңтүстік аймақтарды қоспағанда, елдің басым бөлігінде күн ызғарлы болады"."Қазгидромет" РМК
Бұған қоса синоптиктер қар жауып, бұрқасын күшейеді деп болжап отыр.
Термометр бағандары түнгі уақытта -10-20°С-қа, күндіз-3-10°С-қа дейін төмендейді.
Күз неге жылы боп тұр?
Синоптиктер биылғы күздің жылы болуын, қыстың кешеуілдеуін батыс және оңтүстік циклондармен, Иран мен Жерорта теңізі аудандарынан жылы ауа массаларының келуімен байланыстырып отыр.
"Осыған байланысты Қазақстан аумағындағы температуралық фон климаттық нормадан 3-10° жоғары болды. Метеобақылау тарихында осы жылдың қараша айы өте жылы болды, жылы ауа райының жоғарғы шегі 17-18 қараша аралығында байқалды. Соңғы рет қарашаның жылы болуы 2010 жылы байқалды, ол кезде ауа температурасы нормадан 2-7° ауытқыды"."Қазгидромет" РМК
Астанада соңғы рет күз қашан жылы болып еді?
Күн райын болжаушылардың бағамдауынша, көпжылдық бақылаулар бойынша Астана қаласының ең кеш қарға оранған кезі 1967 жылғы 15 желтоқсанда (56 жыл бұрын) және 2008 жылғы 14 желтоқсанда (15 жыл бұрын) тіркелген.
"Тарихи деректерге сүйенетін болсақ, елордада қар жамылғысының ерте жайғасуы – 10 қазан, орташа жайғасуы – 10 қараша, ал кеш жайғасуы -15 желтоқсан. Соңғы үш жылда – 2020, 2021, 2022 жылдары қарашаның бірінші онкүндігінің соңында, екінші онкүндігінің басында тұрақты қар жамылғысы тіркеліп, орташа биіктігі 8-13 см құрады", – дейді синоптиткер.
