Қарағандыда соққыға жығылған жедел жәрдем жүргізушісі оқиғаның мән-жайын айтты

жедел жәрдем, сурет - Zakon.kz жаңалық 28.01.2024 15:10

Сурет: видео скрині

Қарағандыда соққыға жығылған жедел жәрдем жүргізушісі оқиғаның қалай болғанын айтты, деп хабарлайды Zakon.kz.

"Қалыпты жұмыс күні болатын. Шамамен сағат 23:57-де қоңырау түсті, біз тез арада 2-блок, №30 үйге бардық. Фельдшерлер тез арада үйге кіріп кетті, өйткені бір жасар бала ауырып жатқан еді", - дейді жедел жәрдем жүргізушісі Төреғали Берікқалиұлы.

Оның айтуынша, фельдшерлердің бірі 4-5 минуттан кейін үйден шығып, планшетке бланкілерді толтыра бастаған. Бір-екі минуттан кейін тумбочка көтеріп келе жатқан жас жігітпен жанжал басталған. Жедел жәрдем көлігі оның жолын бөгеп тұрғандықтан ер адам оны боқтай бастаған.

"Мен оған шақыртуда тұрғанымды және кете алмайтынымды түсіндірдім. Ал ол кетіп қалған сияқты болды. Алайда, кейін ол тумбочкасыз қайтып келіп, тағы да балағат сөздер айта бастады. Мен көліктен түстім, сол кезде фельдшер телефонына не болып жатқанын түсіре бастады, себебі ер адам агрессивті болды. Мен оған науқасты, баланы қарауға келгенімізді түсіндіруге тырыстым. Бірақ ол мені тыңдамады", - дейді Төреғали Берікқалиұлы.

Ер адам жүргізушінің бетінен бірнеше рет соққы жасаған. Ал дәрігерлер екінші бригада пен полицияны шақыртқан.

Еске салайық, кеше Қарағанды тұрғыны жедел жәрдем жүргізушісін ұрып-соққан болатын. Полицейлер төбелескен адамның кім екенін анықтады. Қазіргі уақытта шабуыл жасаған адамды ұстау жұмыстары жүргізілуде.

ҚР Денсаулық сақтау министрі Ажар Ғиният жедел жәрдем қызметкерлеріне жасалатын зорлық-зомбылық әрекеттерді қатаң айыптап, бұл оқиғаны жеке өзі қадағалайтынын айтты.

Оқи отырыңыз