Таразда аспалы көпір апатты нысанға айналды
Сурет: pixabay
Салдарынан былтыр биіктен жеңіл автокөлік аударылған. Ұзындығы 100 метрден асатын көпір Тараз бағытындағы төте жол ретінде қолданылады.
Шөлдала мен Құмшағал ауылдарын облыс орталығымен жалғап жатыр. Айналма жолмен салыстырғанда қашықтықты 4 шақырымға қысқартады, деп жазады qazaqstan.tv.
Көпір қауіпті болса да тұрғындар күнде жүруге мәжбүр. "Қараусыз қалдырды!" деп қала әкімдігіне өкпелі.
Ал әкімдік көпірді 20 жыл бұрын апатты деп тапқан. Дегенмен қатынау өткелі қала билігінің балансында болмай шықты. Кеңестік кезеңде шағал шығаратын зауыт иелік еткен. Тоқырау жылдарында өндіріс тоқтаған соң, қараусыз қалады.
Енді ауада қалқыған аспалы көпірді ешкім есебіне алғысы жоқ. Әкімдік көпір экономикалық тұрғыда тиімсіз деп, жөндегісі жоқ. Керісінше көпірден өткендерге алда айыппұл салуды көздеп отыр.
"Көпірдің үстіне шектеу белгілері қойылған. Ол жерден техникалық құралдардың өтуіне тыйым салынған. Көпірді жауып тастайық десек оны жалпы малды айдап өтетін қауіпсіз жол болып тұр. Тиімсіз болғандықтан біз оны алдағы уақытта жөндеуді жоспарлап отырған жоқпыз." Қайрат Исмаил, Тараз қаласы әкімінің орынбасары
