Таразда ретсіз жол таңбалары жүргізушілерді жаңылдыруда
Сурет: pixabay
Әсіресе қаланың қақ орталығындағы қос жолақты таңбалар бейберекет сызылған. Тұрғындар екі жолақты жолдардың ережеге сай болмауын жаңасы төселіп, ескісі жойылмағаннан деп отыр.
Сондықтан сызықтардың саны көбейген. Ал бұл көлік иелерін жиі шатастырады, деп жазады qazaqstan.tv.
Жүргізушілер жол үстінде қай бағытқа бұрылу керектігін түсінбей қалатынын айтады. Әсіресе жаңбырлы күндері ескі мен жаңа таңбаны айыру қиын.
"Екі жолақты қабат сызылғаннан кейін, қандай да болсын қарапайым халыққа қиындау туады. 45 жылдан бері жүргізуші болсақ та біздің өзіміз ондай кезде қателесіп, жаза басып қалсақ айыппұл дейді." Қуан Төлегенов, қала тұрғыны
Ал әкімшілік полиция басқармасы жол таңбаларына қатысты техникалық талаптардың бұзылғанын жоққа шығармады. Олқылыққа жол берген Тараз қаласы әкімдігі дейді. Өйткені қала билігі 2 жылдан бері жол таңбаларын жаңарта алмай отыр. Сызықтардың уақытылы сызылмауына тендерге түскен компаниялардың бір-бірімен соттасуы себеп. Салдарынан жол белгілеріне қатысты ақаулар пайда болған. Бұлай жалғаса берсе, алда қала әкімінің өзіне әкімшілік айыппұл салынады. Жалпы Таразда 1445 көше 56 мың шаршы метр жол таңбаларымен қамтылған.
"29 тексеріс жүргіздік. Соның ішінде 615 ақау табылды. Оның 8 нұсқамасы орындалды, әлі тағы 21 нұсқама орындалған жоқ. Сол себепті біз Тараз қалалық әкімшіліктегі 10 лауазымды тұлғаны әкімшілік жауапкершілікке тарттық. 10 АЕК айыппұл салынды." Жайдарбек Құттыбаев, облыстық ПД әкімшілік полиция басқармасының бастығы
