Атырау облысында ауыл тұрғындарын мәжбүрлі түрде эвакуациялап жатыр

Атырау облысы Махамбет ауданының эвакуациялық комиссиясының шешімімен Талдыкөл ауылының тұрғындарын мәжбүрлі түрде эвакуациялау басталды, деп хабарлайды Zakon.kz.

Атырау облысының төтенше жағдайлар жөніндегі жедел штабының мәліметінше, су басу қаупінің күшеюіне байланысты толық эвакуациялау тұрғындардың қауіпсіздігі үшін жасалып отыр.

Тұрғындар Халел Досмұхамедов атындағы Атырау университетінің №1 жатақхана базасындағы эвакопунктіге орналасады. Сонымен бірге өз қалауымен туыстарының үйіне де бара алады.

Қауіпсіздікті қамтамасыз ету мақсатында Талдыкөл ауылында Қорғаныс министрлігінің 59 сарбазы, Төтенше жағдайлар министрлігінің 17 қызметкері және арнайы техникалар жұмылдырылып жатыр.

"Бұған дейін хабарлағанымыздай, Талдыкөлде 207 тұрғын Атырауға эвакуацияланып, 422 тұрғын өз қалауымен туыстарының үйіне орналасқан еді. Қазіргі уақытта Талдыкөл ауылында қалған 250 тұрғын толық эвакуацияланып жатыр", - делінген хабарламада.

Айта кетейік, Талдыкөл ауылында 1,2 мыңға жуық тұрғын тұрады.