Астанада полицейлер даяшының сөмкесін ұрлаған күдіктіні қолға түсірді

Сурет: polisia.kz

Полицияға қала тұрғыны жүгініп, бейтаныс біреу оның сөмкесін ұрлап әкеткені туралы арыз түсірген. Байқоңыр ауданы полиция басқармасы криминалдық полиция қызметкерлері "ұрлық жасады" деген күдікпен 42 жастағы қала тұрғынын анықтады, деп хабарлайды Zakon.kz polisia.kz-ке сілтеме жасап.

Белгілі болғандай, ер адам кешкі уақытта қаланың оң жақ жағалауында орналасқан кафеге келген. Тамақтану залында отырған кезде ол даяшының көрші орындыққа сөмкесін қойып, өзі басқа жаққа алданып тұрғанын байқайды.

Күдікті қолайлы сәтті күтіп, ішінде Airpods құлаққабын, қуаттағыш және жеке заттары салынған сөмкені күртесінің ішіне жасырып, кафеден шығып кеткен. Жалпы келтірілген материалдық шығын шамамен 115 мың теңге болған.

Аталған факті бойынша қылмыстық іс қозғалды, ер адамның Астана аумағында бұрын жасалған осыған ұқсас қылмыстарға қатысы бар-жоғы тексеріліп жатыр.

Оқи отырыңыз