Биыл қандай республикалық маңызы бар автожолдар жөнделеді
Сурет: Zakon.kz
Көлік министрлігінің мәліметінше, "Астана – Алматы" автомобиль жолын реконструкциялау жобасын жүзеге асыру аясында шамамен 2,5 миллион тонна асфальт төсеу жоспарлануда.
"Қазіргі уақытта республикалық маңызы бар автожолдарға бір миллион тоннаға жуық асфальтбетон төселді. Мәселен, Астана мен Алматыны жалғайтын "Орталық – Оңтүстік" дәлізін реконструкциялау жобасына 560 мың тонна асфальтбетон төселген. "Ақтөбе – Қандыағаш" жобасында 125 мың тонна асфальт төселді және т.б.", — деді ҚР Көлік министрлігі Автомобиль жолдары комитетінің төрағасы Төлеген Абдуллин.
"Талдықорған – Өскемен" тасжолын реконструкциялау барысында 638 мың тонна асфальтбетон пайдалану көзделген. Ал "Атырау – Астрахань" автожолын реконструкциялауды аяқтауүшін 500 мың тоннаға жуық асфальтбетон төсеу жоспарлануда.
Айта кетейік, биылғы жол құрылысы маусымы аясында ҚР Көлік министрлігі 12 мың шақырым жолды құрылыс жұмыстарымен қамтымақ.
"Бұл – рекордтық көрсеткіш. Мәселен, республикалық маңызы бар 5,3 мың шақырым жолда жөндеу жұмыстары жалғасын тапса, 4,2 мың жергілікті маңызға ие жол жөндеу жұмыстарымен қамтылады",- делінген ведомство хабарламасында.
Сонымен қатар Көлік министрлігі салынғаннан бері жөндеу жұмыстары жүргізілмеген жолдарды орташа жөндеумен қамту бойынша жаңа ауқымды бағдарламаны іске асырады. 2,5 мың шақырым жол орташа жөндеу жұмыстарымен қамтылады.
Бұл облысаралық байланысты айтарлықтай жақсартуға мүмкіндік береді. Мысалы, 4 облыстың аумағы арқылы өтетін "Жезқазған – Петропавл" автожолы орташа жөндеу жұмыстарымен қамтылады. Ақтөбе облысындағы "Қандыағаш – Ембі – Шалқар – Ырғыз" тасжолын, ал Шығыс Қазақстан және Абай облыстарында Өскемен мен Семей арасындағы автомобиль жолы жөнделмек.
27 мамырда "Ақтөбе-Қандыағаш" автожолының жөндеу жұмыстары қашан аяқталатыны белгілі болды.
Оқи отырыңыз
