Қанат Шарлапаев су тасқынынан зардап шеккендерге салынып жатқан үйлердің құрылыс барысын тексерді
Сурет: Сурет: ҚР ТЖМ
Соңғы ақпаратқа сүйенсек, республикада 17 864 тұрғын үй су тасқынынан зардап шекті – 12 207 үй және жалғыз баспана болған 5 657 саяжай тіркелді.
Зардап шеккендерді шатырмен қамтамасыз ету жұмыстары жалғасуда - құрылыс-жөндеу жұмыстары жүргізілуде, өңірлерде тұрғын үй сатып алынуда.
Сурет: gov.kz
Ақмола облысының әкімі Марат Ахметжановпен бірге министр Қанат Шарлапаев су тасқыны салдарынан су басқан жеке үйлерді, бұзылған апатты тұрғын үйлердің орнындағы аумақтарды аралап көрді.
Батыс Қазақстан облысына жұмыс сапары аясында министр бағалаушы компаниялар мен сарапшылардың жұмысына арналған мамандандырылған алаңда болды. Алаң Батыс Қазақстан цифрлық технологиялар басқармасының базасында залалды бағалау және азаматтарға көмек көрсету үдерісін жеделдету мақсатында құрылған.
Сурет: gov.kz
Оралда Қанат Шарлапаев пен Батыс Қазақстан облысының әкімі Нариман Төреғалиев кеңес өткізіп, су тасқынынан зардап шеккендерге келтірілген шығынды өтеу тетіктері, жөндеу жұмыстары мен тұрғын үй құрылысының барысын талқылады.
Өнеркәсіп және құрылыс министрлігінің жағдай орталығының мәліметінше, Ақтөбе облысында 4 381 нысанға техникалық байқау жүргізілген. Басты міндет – инфрақұрылымды тезірек қалпына келтіру және қазақстандықтарды қысқа мерзімде жаңа баспанамен қамтамасыз ету.
Қанат Шарлапаев азаматтардың өтініштеріне жедел ден қоюдың маңыздылығын атап өтіп, барлық қажетті шараларды жүзеге асыруды жеделдетуді тапсырды. Сондай-ақ нысандарды аралау барысында министр нысандарды құрылыс материалдарымен толық қамтамасыз етуді және құрылыс сапасын бақылауды күшейтуді айтты.
Анықтама:
Ақмола облысы – 273 үйдің құрылысы басталды, 729 үйде жөндеу жұмыстары жүргізілуде, 39 үйде жөндеу жұмыстары аяқталды, 219 үй сатып алынды.
Ақтөбе облысы – 486 үйдің құрылысы басталды, 3425 үйге жөндеу жұмыстары жүргізілуде, 39 үйге жөндеу жұмыстары аяқталды, 316 үй сатып алынды.
БҚО – 398 үйдің құрылысы басталды, 1297 үйге жөндеу жұмыстары жүргізілуде, 726 үйге жөндеу жұмыстары аяқталды, 1063 үй сатып алынды.
Қостанай облысы – 149 үйдің құрылысы басталды, 829 үйде жөндеу жұмыстары жүргізілуде, 330 үй сатып алынды.
Солтүстік Қазақстан облысы – 700 үйдің құрылысы басталды, 2357 үйде жөндеу жұмыстары жүргізілуде, 3 үйде жөндеу жұмыстары аяқталды, 119 үй сатып алынды.
Атырау облысы – 48 үйдің құрылысы басталды, 1526 үйге жөндеу жұмыстары жүргізілуде, 976 үй сатып алынды.
